دكتور محمود سعد يكتب : علاج الاكتئاب .. العلاج المعرفى السلوكى "1"
طبعا فيه علاجات نفسية كتيرة جدا للاكتئاب مختلفة من الناحية النظرية وبالتالى مختلفة فى الاهداف والاستراتيجيات
واحد من اكثر الانواع العلاجية انتشارا هو العلاج المعرفى السلوكى واللى هو باختصار شديد بيشوف ان كل الاضطرابات النفسية هى فى الاصل خلل فى اسلوب التفكير يعنى الشخص بتتكون عنده افكار سلبية غير واقعية (انا فاشل، انا مليش لازمة، انا عبيط وبينضحك عليا، انا ام فاشلة، انا خيبت اولادى، انا قدراتى محدودة، انا هفضل طول عمرى فى البؤس ده، ربنا غضبان عليا وبيعذبنى فى الدنيا قبل الاخرة).
المشكلة فى الافكار انها مش بتكون تحت وعى الشخص، يعنى موجوده فى العمق، وصعب ان الواحد يكتشف اغلبها بسهولة، لانها ممكن تمر على ذهن الانسان فى ثوانى او اقل
الا ان تاثيرها بيكون كبير جدا، لانها بتعمل مشاعر سيئة، والمشاعر دى هى اللى بتبقى واضحة ومستمرة مع الشخص طول اليوم وممكن لشهور او حتى لسنين (زى الاكتئاب والحزن والاحباط واليأس والضعف)
المشاعر كمان بتؤدى الى سلوك (خمول، كسل، نوم كتير، عدم الاهتمام بالنظافة، انقطاع عن العمل)، وساعات السلوكيات دى بتزود المشاعر السلبية اكتر
ملحوظه 1: كل اضطراب نفسى له نوعية مختلفة من الافكار لكن كلامنا هنا عن الاكتئاب
ملحوظه 2: المنشورات دى مش بديل عن العلاج النفسى او الدوائى، لكنها لرفع الوعى بالعلاج النفسى وتقليل الرهبة منه او للترغيب فيه
الافكار هى العدو الاول للشخص المكتئب (حتى قبل مشاعر الاكتئاب نفسها) عشان كده بتكون الافكار دى هى الهدف الاول للعلاج
ولو عايز تكتشف الافكار دى لازم لما تهاجمك المشاعر السلبية (زى الاكتئاب او الاحباط او ....) تسأل نفسك السؤال ده "ايه الافكار اللى فكرت فيها وخلتنى احس الاحساس ده" ساعتها هترصد كم من الافكار اللعينة اللى بتطاردك
وبالتالى كده الواحد محتاج ورقة وقلم عشان يرصد الافكار دى، ولما تتجمع الافكار دى ممكن نرسم خريطة تفصيلية دقيقة عن الحالة الاكتئابية
كمان الافكار السلبية دى ممكن نصنفها لنوعين كل نوع بنتعامل معاه بشكل مختلف، الاول الافكار السلبية غير الواقعية (هنتكلم عليها المرة القادمة)، والثانى السلبية الواقعية
والافكار السلبية الواقعية ممكن تبقى زى "انا بينضحك عليا، انا مش بعرف اخد حقى، انا ضيعت حقوق اولادى، انا متسرعة فى قراراتى" واذا كانت الافكار دى صحيحة وبياكدها الواقع هنا لازم الشخص يتعلم مهارات زى توكيد ذاته من خلال انه يتعلم يعترض او يقول رايه المخالف امام مجموعة من الناس او يقول "لأ" من غير ما يبررها، وطبعا لو ليه فلوس يطالب بيها، ولو ليه حق يرفع قضية مثلا
ملحوظة: الافكار السلبية الواقعية اغلبها بيكون ناتج عن نقص فى المهارات الاجتماعية خصوصا توكيد الذات واللى هى ممكن تكون موجودة قبل الاكتئاب نفسه وربما كانت من اسبابه
لنا تكملة بإذن الله .
مقالات أخرى للكاتب
تعليقات
إرسال تعليق