مسلسل شقة 6.. رعب وتشويق وسط معركة الانتشار باستخدام الأسلحة التقليدية

صورة
مسلسل شقة 6..  رعب وتشويق وسط معركة الانتشار باستخدام الأسلحة التقليدية تدين صناعة الدراما بشكل خاص للكاتب الكبير الراحل د.أحمد خالد توفيق عليه رحمة الله بإنقاذها من شبح الملل والتكرار والأفكار المكررة المعلبة منذ عشرات السنين. فبعد النجاح الكبير لمسلسل "ما وراء الطبيعة" و الذي أنتجته منصة "نتفيلكس" العملاقة والذي كان نجاحه مرتبط بالشعبية الهائلة للكاتب الراحل الكبير بين الشباب انتشرت دراما الرعب كالنار في الهشيم. ومع الانتشار التدريجي والاستحواذ للمنصات الرقمية علي سوق الدراما والتي تعد أيضا تهديدا حقيقيا لصناعة السينما بشكل خاص وستقضي مع الوقت نهائيا على القنوات الفضائية التي قتلت شغف المشاهد باعتمادها على شهر واحد فقط لعرض كل ما في جعبتها من إنتاج مع فاصل لا ينتهي من الإعلانات المكرره السخيفه المملة وجد المشاهد ضالته في تلك المنصات "أو في المواقع التي تسرق ما تعرضه تلك المنصات حصريا" التي يجد فيها المشاهد ما يريد وفي أي وقت بعيدا عن الجمعيات الخيرية التي تطالبه بالتبرع ولو بجنية أو عن الكومباوندات الأفلاطونية التي تطالبه بانتهاز فرصة العمر وشراء ڤيلا بس

نرجس وإيكو"قصة قصيرة"

                  

نرجس وإيكو "قصة قصيرة"

 نرجس وإيكو "قصة قصيرة"


في عالم خيالي غير واقعي غير حقيقي غير موجود في الوجود متشابك متداخل مليء بالآلهة والسحرة والعفاريت تدور قصتنا 

_____________________________

-بقي انا يا زيوس يابن ام زيوس تعمل فيا كدة

هيرا زوجة زيوس كبير آلهة الإغريق بتزعق بأعلي صوتها وبتردد في غيظ وهي بتتكلم مع خادمتها عطيات اللي بترد عليها بأقصى سرعة خوفا منها

اهدئي يا ستي هيرا احنا خلاص مسكنا البنت اللي اسمها إيكو دي وهي اعترفت ان هو اللي بعتها علشان تلهيكي عنه ويخلي له الجو براحته ويعرف بنات زي ماهو عايز ... خلاص بعد ما مسكناها وعرفنا سرها هتقدري تراقبيه براحتك ... دة غير طبعا ان إيكو دي حتشوف معانا لحظات حرجة هتخوف اي حد بعد كدة أنة يقرب منك لمصلحته لما يشوف العذاب اللي هيجرالها

هتجنن يا بت يا عطيات  ... زيوس يخوني انا .. انا ...ازاي يخوني ومع مين .. مع كل دول دة مرحمش لا آلهة ولا بشر ... ازاي يعمل كده ... بذمتك في اجمل مني يا عطيات ياختي ومن وشي السمح دة ..

غمضت هيرا عينيها ورفعت رأسها لفوق وأخذت وضع عارضات الأزياء في مشهد مرعب بصت عطيات لوش هيرا والرعب في عينيها وقالت في سرها (ياما.. أعوذ بالله من غضب الله.. والله عنده حق دة وشك يقطع الخلف فعلا) لكنها قالت لها وهي تبتسم في ارتباك

-فشر ... هو في زي ستي هيرا وجمالها وحسنها في الدنيا دي كلها كح كح كح 

هيرا تعدل شعرها من علي عينيها في دلال مصطنع خلي عطيات تبرق من الخوف وهي بتكمل في غيظ 

البت إيكو دي انا لازم ألعنها لعنة محصلتش لحد ..لازم أعذبها واموتها مقهورة ... لاء انا مش هموتها انا هعذبها للأبد ومن غير ما تموت .... (عععععععععععع) بتبكي في حرقة ... يا ميلة بختك يا هيرا سمعتي ضاعت وسط الآلهة تقول عليا ايه دلوقتي البت أفروديت مقصوفة الرقبة يا شماتة أبلة ظاظا فيا وابلة فاهيتا و أبلة نظيرة كمان

-ودول مين بقي الهه جداد ولا ايه

لاء دول من عيلة كبيرة تانية مليانة آلهة وعفاريت يا ظريفة .... دة قلش مايتقلش علي فكرة واسكتي لضربك تعويذة تقلبي برص ولا صرصار .... يا عشمااااوي ...هاتلي البت إيكو حالا ....  الحفلة خلاص هتبدأ وحتشوف الويل و عذاب الليل .... بتبكي تاني عععععععع . 

 

_________________________________

 

يا تري عملت فيكي اية الولية المهبوشة دي يا إيكو،كان مالك انتي ومال الآلهة دول وعالمهم العجيب الرهيب دة .. ازاى خليتي زيوس يستغل لسانك وكلامك الجميل اللي بتسحرى به الناس ويخليكي تلهي مراته علشان يقدر يجري ورا حفلات هيفاء وهبي براحته رغم انها ولا حاسة بيه مع انة اله كبير قد الدنيا ومعاه شهادة عليا كمان ومستقبله مضمون.

ياتري عملت فيكي ايه وهي مبرقة فى وشك وعمالة تضحك بجنون وشعرها واقف ومنكوش وهي بتقرأ تعاويذ مخيفة وعطيات بتغني حسرة عليها ياحسرة عليها .

ليه سابتك بالسهولة دي ومنتقمتش منك انتقام أعنف وقلبتك سحليه مثلا.. وبعدين ايه سبب الصداع الرهيب اللي ماسك دماغك ده من  بعد ما سابتك .

اية الأصوات والدوشة دي في ايه !

 اية دة  مين اللي جاي من بعيد ده والدنيا اتقلبت علشانه؟ 

مش ممكن دة نرجس , حبيبها وأجمل شباب المنطقة كلها وأشهرهم .

طبعا كل اللي حواليه دول بنات مجانين بيه وبيحولوا يلفتوا نظرة يمكن يحب واحدة فيهم ويتجوزها . ازاي  يحس بيكي يابت يا إيكو ويحبك زي ما انتي بتحبيه؟

ازاي يا إيكو ؟

يا تري لو عرفك ممكن يعجب بيكي ويحبك فعلا؟

يبقي لازم يعرفك من قريب ويشوِّفك . لازم تكلميه المرة دي وتسحريه بلسانك وكلامك الجميل اللي سحر غيره قبل كدة كتير و تخليه يحبك ويعشقك ويتجوزك ويخرجك أنتي وأهلك من الفقر اللي طول عمرك عايشه فيه .

أهو بيقرب أهو وجاي لوحدة بعد ما قدر يفلت من معجباته .

اتشجعي يابت قبل ما يطير منك وتخطفه الهة ولا عروسة بحر ولا حتى تأكله سلعوة , يلا تشجعي يا خايبة وكلميه

-بس بس بس بس بس بس بس بس

حضرتك بتبسبسيلي ولا قطتك ضايعة منك و بتدوري عليها

-بس بس بس بس بس بس بس بس

-انتي هبلة يا بت

-بس بس بس بس بس بس بس بس

-بس بس براحة طيب وفهميني في ايه

-فهميني في ايه .. فهميني في ايه ..فهميني في ايه

دلوقتي بس إيكو عرفت هيرا لعنتها ازاي .. لسانها وكلامها اجمل ما فيها راحوا  خلاص كل جملة تسمعها بتفضل تردد اخر تلات كلمات فيها غصب عنها زي صدي الصوت ولو حبت تتكلم متقدرش تقول من عندها غير كلمة واحدة بس و تفضل تعيد فيها بردو .

ميصحش كدة بجد , الله يحرقك يا هيرا دة الموت كان ارحم لها من العذاب ده الواد نرجس هيقول عليا دلوقتي مجنونة وش ومش ممكن يحبنى ابدا 

-أنا أنا أنا أنا أنا أنا أنا أنا أنا أنا

بموت في حبك أنا أنا .... يا بنتي انتي مكانك مش هنا انتى مكانك هنااااك في أوبرا روما .... أو في العباسية .

-إيكو إيكو إيكو إيكو إيكو إيكو إيكو إيكو

صح عندك حق ... اقولك حاجة .. قرب منها ومسك أيديها وسبل عينيه وبص في عينيها .. اكيد حس بيها وهيقولها بحبك دلوقتي ومقدرش اعيش من غيرك و هحققلك كل أحلامك .. فرحت قوي واللهفة ملت قلبها  وهو بيقول بكل رقة .. سلام على إيكو إيكو إيكو إيكو نيهاهاهاها .. يا مجنوووووووووونة .. يا فكياااااااك

-يا مجنونة يا فكياااااااك يا مجنونة يا فكياااااااك يا مجنونة يا فكيااااك

إيكو مش عارفة تعمل ايه .. حست بإهانة شديدة من كلام نرجس وبأنه سابها وجرى منها بالشكل دة فجاة زي ما يكون بيهرب من حرامي بس كانت بدأت خلاص تقولة

بحبك بحبك بحبك 

دموعها على خدها وبتحاول تسكت ومتترددش الكلمة ومش عارفة .

بحبك بحبك بحبك .

حست  فجأة انها كرهته ومشمئزة وقرفانة منه لكنها مش قادرة تبطل تردد الكلمة 

بحبك بحبك بحبك .

بتحاول تكتم بقها وتقفلة بأديها لكن الصوت  بيطلع برضو رغم أن  بقها مقفول 

بحبك بحبك بحباااااااااك 

لغاية ما وقعت وأغمي عليها

________________________________

هو الواد نرجس ده فاكر نفسه ايه .دة انا كيوبيد إله الحب على سن ورمح .هو الواد ده فاكر البنات هتحبه هو وتنسي كيوبيد الساحر دنجوان عصره وأوانه وجيمس دون المجرة كلها؟

ينسوني أنا أيوة  وأشد انا بودرة بقي .

دي  هزلت بجد .هى الدنيا جرى فيها أية يا جدعان ؟

دة انا كيوبيد محطم قلوب العذاري ومستر ايجيبت أوروبا و العالم خمس سنين ورا بعض ومالة متنك كدة علي الكل وبيعاملهم بغرور وقرف ومش معبر حد؟

علي ايه يعني .

اهو جاي من بعيد بيجرى زى العبيط أهو ده انت  هتشوف اوقات فراغ معايا يلا ..ده انا بابا يلا , خسرتني للأبد يا نرجس وهي كلمة وأنا قولتها مش لعبت مع الأسد يبقى استحمل بقى

دة انا هخليك تحب البت إيكو اللي جرحتها بكل قسوة وكنت هتموتها وجريت منها وسبتها لوحدها واعيشك في كابوس .

دة انا هخليك تحبها من غير ما تعرف انها هي وهخليك تجري وراء الوهم بطريقتي ... يا نهااااااااااار ابيض على اللى هيجرالك ... ده أنت سيديهاتك كلها معايا يا بيه .

بيطلع كيوبيد سهم الحب من الكيس العجيب بتاعة ويوجه بكل هدوء السهم ناحية قلب نرجس وبيضرب بكل قوة وثبات وبدون شفقة  ويصيب هدفه بكل دقة .. و يضحك يضحك يضحك 

نيهاهاهاهاهاهاهاهاهاها 

________________________________

بصراحة هو عمره ما حب ولا اي واحدة من اللي عرفهم ..هو اصلا مش بيعترف بالحب خالص لكنه بصراحة كان بيتمتع وهو شايفهم بيتعذبوا علشانه وهيموتوا عليه وهو على وضعه ولا همه .

نرجس كان عنده اعتزاز وغرور وزهو كبير قوي بنفسة وكان بيزيد غرورة ده كل ما بيخلص علي ضحية جديدة بدون اي رحمة . 

حس بالعطش فمشي بهدوء وثقة وهو بيصفر ببقه موسيقي اغنية مهرجان (مصطفى شعبان يا مجنن النسوان)  ناحية النهر علشان يشرب منه وقال بصوت عالي

المفروض يبقي في علم النفس تعريف علمي ليا ويسموه (النرجسية) هاهاهاهاهاها  

مد يده ناحية البحر علشان يشرب وفجأة اتسمر مكانه .. اية العيون  البشرية اللي بتبصلي دي من تحت  المياه .. انتي مين .. سبحان من ابدعك انتي ازاي جميلة كدة انتي بجد ولا اكيد وهم وخيال وفوتوشوب ... انتي اكيد حورية البحر السحرية انا عرفت كتير وشوفت كتير لكن انا مشفتش جمال كدة ابدا ولا روعة زي كدة .

الحورية بتبص له بثبات وثقة أكبر من ثقته ودة جننه  اكثر لانه مش متعود علي كده .. ابتسم لها وابتسمت له  شاور لها وشاورت له  ضحكت تاني نفس الضحكة وراحت ماشية ..وجريت فجأة زي ما كان هو بيعمل في البنات  .. قلبه خفق في قوة .. حس نرسيس برعشة خفيفة تسري في جسمة كلة .. رعشة جميلة خدرته ونغزت قلبه بحنان ورقة وخلته يحس بسعادة حقيقية غامرة عمرة ما حس بيها قبل كدة ابدا   

-ايه يا جدعااااااان اللي بنعمله في الناس هيطلع علينا ولا ايييييييية

فضل مستني قدام النهر سنين يمكن الحورية تظهر مرة تانية لغاية ما يأس ومشي وحس انه عايز يريح شوية .

عيون إيكو (الحورية) مش بتفارق خيالة .. حتى وهو نايم شايفها .. ولما بيصحى بيحس بيها حوليه .. الغريب انه حاسس انه شافها قبل كدة بس مش عارف هي مين .. ايه الورطة السودة دي ده باينه حبها ولا اييييه .

عملتها يا كيوبيد الكلب ونفذت انتقامك مني بعد ما صرخت انا قبل كدة بكل قوة في وشك وقلت ... من انهرده مفيش كيوبيد ... انا كيوبيد ... انا كيوبيد  .

طب  يا تري هي بتحبه ولا لاء؟

اية العذاب اللي هو فية دة هو دة الحب اللي بيقولوا عليه جميل ... دة عذاب وتفكير في كل احتمال وعكسة .. طب يا ترى هستريح فعلا لو عرف ان حبيبته بتحبه ولا هيحس وقتها بورطة المسؤولية والالتزام وفلوس الشبكة والمهر والعفش والنيش وخناقة المؤخر وتجهيز كهف محترم وخلافة .

يا تري هو عذب  كام واحدة قبل كدة بالشكل ده  زي ما هو  بيتعذب كدة ؟

يا تري حسوا بكل العذاب دة وهو كان السبب في عذابهم من غير مايحس بأي ذنب ؟

لاء يا نجم انت ضميرك هيصحي فجأة ولا اية يا برنس ما طول عمره ميت مش وقتة الله  يخليك أنت خليك على وضعك دلوقتى واطلع اجري بسرعة على النهر يلا ودور علي حبيبتك وصارحها بحبك ويمكن وقوعك في الحب وتعبك دلوقتي يكون انتقام وتعويض عن اللي جرحتهم قبل كدة فتستريح وتريح البنات منك .

بيقرر انه يجري ناحية النهر تاني باقصي سرعة . اخيرا وصل وهو بينهج ومش شايف من التعب . الحورية ظهرت فعلا . حبيبته مستنياه من وقتها يبقى ملهاش احتمال تاني يبقي اكيد بتحبه وبتفكر فيه من ساعتها زي ماهو كان  بيفكر فيها بردو .

بيضحك وهو مرهق وعينيه مليانة رجاء وحب والحورية بتضحك له  .. اية  دة دي بتشاور له  ينزلها زي ماتكون بتقولة المياه تجنن تعالي ناخد غطس مع بعض .. طبعا حينزل وشششش خصوصا إنها لابسة بوركيني حكاية .

-لاء لاء لاء لاء لاء لاء لاء لاء

صوت إيكو يظهر فجأة .. بنت المجنونة دي اية اللي جابها دلوقتي هو مش خلص منها .

ايكو المجروحة بتبص من بعيد على المنظر العجيب ونرجس بيكلم نفسة وبيعمل حركات غريبة وبيشاور ناحية النهر وبيضحك .

شايفاه عايز ينط في النهر العميق وشايفة تمساح كبير فاتح بقه وعمال يلحس شفايفه بلسانه في جوع واضح وعينية بتبرق في لهفة واشتياق

هل هي بقت فعلا مش بتحبه؟

ميهمش مفيش الكلام دة خالص دلوقتي الموقف موقف إنساني واضح ولازم تساعدة بأي طريقة لكنها عاجزة عن ده كل ما تحاول تحذره ميطلعش منها غير

-لاء لاء لاء لاء لاء لاء لاء لاء

نرجس بيسمع صوت إيكو وهو بيهتف لاء بكل قوة فبيفقد أعصابه وبيزعق من غير ما يبصلها

-اسكتي بقي .  يلعن  ..........

موقف أسطوري عجيب وغريب ..إيكو مش عارفة أن نرجس هيتجنن ويبقى معاها هى وأن صورتها بتطارده فى المياه ونرجس مش عارف ان اللي بيزعق فيها دي ومش طايقها وفاكر انها بتمنعه عن حبيبته هي حبيبته اللي بيدور عليها بجنون وان الصورة اللي بيشوفها في النهر هو مجرد انعكاس سحري وهمي عملة كيوبيد لصورتة إيكو 

نرجس بيهتف والجنون أتكلم منه 

-جايلك يا بحر . جايلك يا حبيبتي . جايلك يا اجمل هدية في الدنيا دي كلها .

وبكل سعادة بينط للنهر وفي نفس اللحظة بينط التمساح لفوق في الهوا وهو فاتح بقه على الاخر علشان يبلعه و يلتقي الحبيبان في الهواء ويتعانقان في مشهد سينمائي رائع وخلاب وبكل سعادة وفرح ونشوة بيستقبل التمساح نرسيس في بقه وعلي مرة  واحدة بيرشق نرسيس في معدة التمساح اللي بيسبح بكل سرعة بشكل متعرج في سعادة رهيبة واحتفال وفرحه بالعشوة اللذيذة الشهية  الغير متوقعة .

وبتستمر إيكو للأبد فى ترديد لاء لاء لاء لاء لاء لاء لاء لاء وهى بتشوف حبيب عمرها بيضيع منها قدام عنيها فى كرش التمساح .

وبيروح نرجس في الوبا زي هنادي وتظهر نبتة جميلة وحزينة في المكان دة عند النهر وعند كل شط اسمها (النرجس)وبتردد إيكو وللابد آخر كلام تسمعه وبيبقي صدي الصوت المتكرر باللغات اللاتينية المرادف بتاعه (إيكو) تخليدا لذكراها علشان تخلد قصة الحب العجيبة العكسية الدرامية البهلوانية الغير مسبوقة بين نرجس وإيكو وتبقي زيها زي قصص الحب الشهيرة روميو وجوليت وقيس وليلى وعيلاء وعبلة

تمت .... مستوحى من أسطورة إغريقية قديمة .


أقرأ أيضا



تعليقات

المشاركات الشائعة من هذه المدونة

من هو فيجو الدخلاوي الذي يتم البحث عنه علي ويكيبيديا.. "هنعمل مهرجانات"

الانهيدونيا "anhedonia".. كيف تموت المشاعر وهل يمكن أن تعود إلي الحياة من جديد؟

من هو سيف زاهر.. ما لن تجده على ويكيبيديا